Uretrit kasalligi yoki siydik yo'llari shamollashi haqida

Uretrit - bu uretraning yallig'lanishi. Ko'pincha uretrit jinsiy yo'l bilan yuqadigan infeksiyalar tufayli yuzaga keladi. Ko’pincha erkaklar uretritdan aziyat chekadilar.

Uretrit sabablari

Erkaklarda siydik chiqarish yo'llari - bu butun tanosil tizimi uchun o'ziga xos "eshik" kabidir. Jinsiy aloqada qindan infeksiya avval erkak siydik kanaliga, so'ngra prostata, urug' pufakchalari, moyaklar va boshqa organlarga tushadi. Uretrada infeksiyani oldini olish uchun bir qator tizimlar mavjud (shilliq to'siq, mahalliy immunitet omillari), ular odatda juda samarali ishlaydi. Masalan, gonokokk tashuvchisi bo'lgan ayol bilan bitta jinsiy aloqada, erkaklarda kasallik yuqtirish ehtimoli 20% dan oshmaydi. Infeksiya ehtimoli himoyalanmagan jinsiy aloqa sonining ko'payishi va mahalliy immunitet patologiyasida ortadi.

Gonokokk bo'lmagan uretritga turli xil patogenlar sabab bo'lishi mumkin, ammo ko'pincha sabablar: xlamidiya, trixomonalar, ureaplazma va mikoplazma bo’ladi.

Gonokokk bo'lmagan uretrit uchun davolash uning qo'zg'atuvchisiga bog'liq. Davolash kursidan so'ng laboratoriya nazorati majburiydir.

Uretrit turlari

Uretrit odatda ikki turga bo'linadi: gonokokk va gonokokk bo'lmagan.

 Foto: b18-vlg.ru

Gonokokk uretriti gonoreya deb ataladi. Gonoreya qo'zg'atuvchisi - Neisseria Gonorrhoeae - grammusbat hujayra ichidagi diplokok.

Gonoreyaning inkubatsion davri (infektsiyadan klinik ko'rinishlarning boshlanishigacha bo'lgan vaqt), ma'lum bir gonokokk shtammining xususiyatlariga va mahalliy immunitet holatiga qarab, 12 soatdan 2-3 oygacha, lekin ko'pincha 3 -5 kun.

Uretrit alomatlari

O'tkir gonoreya uretritidagi eng xarakterli shikoyatlar: siydik chiqarish kanalidan yiringli oqim, qizarish va siydik chiqarish kanali yopishqoqligi, tez-tez siyish, siyish paytida og’riq.

Gonokokk bo'lmagan uretrit tashxisi, siydik yo'lidagi gonokokklar bo'lmagan taqdirda, bemorda siydik yo'llarida yallig'lanish mavjudligiga asoslanadi. Kasallikning o'ziga xos qo'zg'atuvchilarini aniqlash uchun PCR diagnostikasini o'tkazish, shuningdek, posev tahlilini o’tkazish juda muhimdir.

Klinik jihatdan gonokokk bo'lmagan uretrit ko'pincha siydik yo'lidan ko’p miqdorda shilliq oqishi, shuningdek og'riqli va tez-tez siyish bilan namoyon bo'ladi.

Uretrit - tashxislash

Gonoreya uretritining diagnostikasi odatda oddiy. Ko'pincha, siydik yo'lidan mazok olinadi, va Gramga bo'yab tahlil o’tkaziladi (tahlilda diplokokklar va leykotsitlar soni ko'paygani aniqlanadi). PCR shuningdek aralash infeksiyalarni (xlamidiya, trihomoniaz, ureaplazmoz) istisno qilish uchun qo’llaniladi.

Uretritni davolash

Gonoreyali uretritni davolash mumkin. To'g'ri dozada seftriakson kabi zamonaviy antibiotiklarni qo’llash, odatda, gonoreya uretritining alomatlarini to'xtatishga imkon beradi. Ammo, bu davolash ko'pincha infeksiyani to'liq yengish uchun yetarli emas. Terapiya natijalari takroriy laboratoriya tekshiruvlari bilan kuzatilishi kerak. Nima uchun bu muhim? Birinchidan, hozirgi vaqtda bemorlarning 40 foizdan ko'prog'i aralash infeksiyalarga ega. Ikkinchidan, yetarli darajada davolanmagan holda, siydik yo'lidagi yallig'lanish jarayoni surunkali yo'lga o'tishi va keyinchalik (bir necha yildan so'ng) o'ta og'ir asoratga olib kelishi mumkin. Bundan tashqari, infeksiya uretradan tanosil tizimining boshqa organlariga, masalan, prostata beziga tarqalishi mumkin.

Yuqorida aytib o'tilganlarni umumlashtirib shuni ta'kidlash kerakki, uretrit kasalligi tashxisi va davolash terapiyasi, odatda, malakali mutaxassisga qiyinchilik tug'dirmaydi. Shu bilan birga, noto'g'ri davolanish surunkali yallig'lanishni (surunkali uretrit) va o'ta noxush asoratlarni (prostatit, uretraning qisilishi va boshqalarni) rivojlanishiga olib kelishi mumkin.

manba: gosmed.ru