Sigareta chekish zararlari va sigareta tutunining tanaga ta'siri

- Sigareta chekish jarayonida ajralib chiqadigan tutun tanaga turli yo'llar bilan zarar yetkazadi lekin odamga bu darhol sezilmaydi.

- Sigareta tarkibiga kiruvchi kimyoviy moddalar istisnosiz barcha organlarga zarar yetkazadi. Jahon sog'liqni saqlash tashkiloti (JSST) ma'lumotlariga ko'ra, sigareta chekish kamida 25 kasallik bilan bog'liq. Sigareta dunyodagi o'limning asosiy sababi hisoblanadi.

- Sigareta kanserogen ta'sirga ega bo'lib, tananing 12 dan kam bo'lmagan qismlarida saraton kasalligini keltirib chiqaradi: o'pka, og'iz, burun bo'shlig'i, hiqildoq, tomoq, qizilo'ngach, oshqozon osti bezi, oshqozon, jigar, buyrak tos suyagi, o't pufagi. Shuningdek, sigareta miyeloid leykemiyani, ya'ni qon saratonini keltirib chiqaradi.

- Sigareta, shuningdek, yurak-qon tomir kasalliklari(40% hollarda), surunkali obstruktiv o'pka kasalligi (80% hollarda), xavfli o'smalar (30% hollarda, shu jumladan 90% o'pka saratoni) rivojlanishida xavfli omil hisoblanadi. Tamakidan voz kechish orqali ushbu kasalliklarning 40% oldini olish mumkin.

 Foto: pgtk.edu.ru

Chekishning sog'liqqa ta'siri:

Nafas olish yo'llariga sigareta ta’siri - bronxit, surunkali obstruktiv o'pka kasalligi, o'pka saratoni.

Qon aylanish organlariga sigareta ta’siri - bosimning oshishi, pulsning tezlashishi, tomirlarning torayishi (gangrena), tomirlarning ichki qoplamasining shikastlanishi (qon tomir, yurak xuruji).

Ovqat hazm qilish organlariga sigareta ta’siri - oshqozon buzilishi, oshqozon yarasi.

Og'iz bo'shlig'iga sigareta ta’siri - tish go'shti yallig'lanishi, og'iz saratoni.

Teriga sigareta ta’siri - terining tez qarishi, oqarishi va rangsizlanishi.

Jinsiy a'zolarga sigareta ta’siri - bepushtlik, jinsiy zaiflik.

Homilaga sigareta ta’siri - erta tug'ilish, kam vazn, yomon sog’liq.

Umumiy sog'liqqa ta’siri - umr ko'rish davomiyligini qisqartiradi.

 Foto: pgtk.edu.ru

Chekishning og'iz bo'shlig'iga zararli ta'siri:

Sigaret chekadigan kishining milklari og’riydi va ko’p qonaydi.

Sigareta bilan bog'liq milk kasalliklari:

- milklarning yallig'lanishi, tish ildizi atrofidagi to'qimalarning yallig'lanishi va bakterial qatlam paydo bo’lishi mumkin;

- milk tish tagidan ajralishi;

- tishlar to’kilishi, maydalanishi va sezgirligi.

- sigareta og'iz saratoni xavfini oshiradi.

Og'iz saratoni labda, tilda yoki yonoqning ichki qismida paydo bo'ladi (prekanseroz holat). Dudoqlar saratoni va til saratoni agressiv va tez rivojlanayotgan saratondir. Shuningdek, saraton tomoq, bodomsimon bezlarda paydo bo'lishi mumkin. Ushbu saraton kasalliklarining 90% to'g'ridan-to'g'ri sigareta iste'mol qilish bilan bog'liq.

Chekishni tashlaganingizda, blyashkalar soni kamayadi. Shuningdek, u og'iz saratonini rivojlanish xavfini kamaytiradi.

Chekishning yurak va qon aylanish tizimiga zararli ta'siri:

Chekuvchi odamda yurak-qon tomir kasalliklarini rivojlanish xavfi chekmaydiganlarga qaraganda 2-4 baravar yuqori. Yurak-qon tomir tizimi kasalliklari dunyo bo'ylab o'limning asosiy sababidir.


Sigareta chekish yurak xurujlari va qon tomirlari torayishiga olib kelishi mumkin.

Chekish organlarning periferik qon ta'minoti buzilishini keltirib chiqaradi. Og'riqli spazmlar, uyqusizlik va oyoqlarda charchoq hissi paydo bo'ladi. Qon ta'minotining yetishmasligi infeksiyalar xavfini oshiradi, gangrenani keltirib chiqaradi va oyoq-qo'llarni amputatsiya qilishga olib keladi.

Agar chekishni tashlasangiz, yurak xurujiga duchor bo'lish xavfi kamayadi va oyoqlaringizdagi spazmlar asta sekin yo’qoladi, chunki qon ta'minoti yaxshilanadi.

Chekishning nafas yo'llariga zararli ta'siri:

Sigareta tutunidagi kimyoviy moddalar surunkali o'pka kasalligini keltirib chiqaradi.

Sigareta tutunidagi moddalar nafas yo'llarini bezovta qiladi, o'pka to'qimalarining elastikligini pasaytiradi va o'pka alveolalarining devorlarini buzadi.

Surunkali nafas qisilishi, yo'tal paydo bo’ladi.

O'pka saratoni holatlarining 90% sigareta chekish bilan bog'liq, sigareta tarkibidagi kanserogenlar va smola saraton kasalligining paydo bo'lishiga olib keladi va uning rivojlanishiga hissa qo'shadi. Kasallik endigina boshlanganda o'pka saratoni yashirin bo'ladi. Qonli yo'tal va nafas qisilishi kabi alomatlar paydo bo'lganda, saraton allaqachon boshqa organlarga, ayniqsa suyaklarga, jigarga va miyaga tarqalib ketgan bo'lishi mumkin.

Chekishni tashlaganingizdan bir necha kun o'tgach, nafas olish yaxshilanadi, hid va ta'm sezgisi tiklana boshlaydi. Bir necha oydan keyin chekuvchining yo'tali ham yo'qoladi. Turli o'pka kasalliklari xavfi sezilarli darajada kamayadi. Shuni esdan chiqarmaslik kerakki, o'pkaning funksiyasi nafaqat an'anaviy sigaretani rad etish bilan, balki boshqa chekadigan tamaki mahsulotlarini, shu jumladan kalyan yoki sigaralarni rad etilganda ham yaxshilanadi.

Chekishning psixikaga zararli ta'siri:

Nikotinni rad etish bilan miyaning ishi sezilarli darajada yaxshilanadi, kuch va diqqatni jamlash qobiliyati oshadi. Xotira ham yaxshilanadi, uyquchanlik va bosh og'rig'i yo'qoladi.

Chekishning tashqi ko'rinishga zararli ta'siri:

Sigareta chekkanda tashqi ko'rinishini yomonlashtiradigan ko'plab aniq belgilar mavjud:

- Teri kulrang bo’ladi va ajinlar tezroq paydo bo'ladi.

- Tishlar, milklar va barmoqlar sarg'ayadi.

- Og’iz bo’shlig’idan, sochlardan va kiyimlardan yoqimsiz hid keladi.

Chekishni tashlash terining rangi va elastikligini sezilarli darajada yaxshilaydi. Sigaret chekmaydigan qariyalarning ajinlari 25 yil davomida kuniga bir pachka chekganlarga qaraganda 5 baravar kam.

Chekishning homiladorlikka zararli ta'siri:

Shuni unutmasligimiz kerakki, chekish erkaklarning quvvatini pasaytiradi va sperma sifatini pasaytiradi. Chekishni tashlash erkakning ota bo'lish qobiliyatini oshiradi. Ayollar uchun chekish homilador bo’lish jarayonini murakkablashtirishi mumkin. Agar siz chekishni tashlasangiz, ko'plab mumkin bo'lgan asoratlar xavfi kamayadi.

Homiladorlik paytida chekish onaning va kelajakdagi bolaning sog'lig'iga jiddiy tahdid soladi.

Homiladorlik paytida onaning chekishi (faol va passiv) quyidagi asoratlar xavfini oshiradi:

- Homila o'sishining sustligi, erta tug'ilish xavfi,

- Chaqaloq kam vazn bilan tug'iladi,

- Homilaning tushib qolish xavfi,

- To'satdan o'lim sindromi xavfi,

- Boladagi tug'ma patologiyalar rivojlanishi xavfi,

- Onada ona suti yetishmasligi,

- Immunitet pasayganda bolaga tibbiy yordam kerak bo’ladi.

Homiladorlikning boshidagi barcha ayollar jismoniy va ruhan sog'lom bolani orzu qiladilar. Biroq, faktlar shuni ko'rsatadiki, kelajakdagi ko'plab onalar, rivojlanish salohiyatiga ega bo'lgan sog'lom bola tug'ilishiga hissa qo'shish uchun turmush tarzini o'zgartirishga va yomon odatlardan voz kechishga tayyor emaslar.

Ijobiy ta'sir chekishni tashlaganingizdan so'ng darhol boshlanadi:

20 daqiqa - yurak urishi va qon bosimi normallashadi

1 soat - homiladorlik paytida asoratlar xavfi kamayadi

8 soat - qondagi nikotin darajasi pasayadi, qon ta'minoti yaxshilanadi

1-kun - o'pkaning faoliyati yaxshilanadi, organizmdan uglerod oksidi (CO) chiqariladi

2 kun - nikotin tanadan ajralib chiqadi, tug'ilmagan bolaning o'sishi uchun xavf kamayadi

3 kun - energiya darajasi ko'tariladi, nafas olish osonlashadi

1 oy - nikotin absistensiyasi kamayib, nafas olish va energiya darajasi yaxshilanadi

6 oy - bolada nafas olish buzilishi, astma, allergiya, otit va boshqa kasalliklar xavfi kamayadi

Farzandingiz sog'lom onaga muhtoj. Tuqqandan va emizishdan keyin yana chekishni boshlamang! Sizning va farzandingizning yonida hech kimning chekishiga yo'l qo'ymang!


manba: tubakainfo.ee24 ta ovoz
Ovoz berish:

1 2 3 4 5